Kolleksiyalanadigan hadyalar, xabarlarni qidirish filtrlari va boshqalar

Bugun biz Telegramning 2025-yildagi birinchi yangilanishini taqdim etmoqdamiz. U boshqa foydalanuvchilarga oʻtkazish yoki qayta yuborish mumkin boʻlgan kolleksiyalanadigan hadyalar, hodisalar haqidagi xizmat xabarlariga reaksiyalar yuborish imkoniyati, xabarlarni qidirish uchun filtrlar, ilova ichidagi QR kod skaneri va boshqa koʻplab yangiliklarni oʻz ichiga oladi.

Kolleksiyalanadigan hadyalar

Telegramda olgan hadyalaringizni endi kolleksiyalanadigan hadyalarga aylantirish mumkin. Kolleksiyalanadigan hadyalar maxsus xususiyatlarga ega boʻlib, boshqa foydalanuvchilarga oʻtkazilishi yoki NFT bozorlarida auksionga qoʻyilishi mumkin.

Hadyani yangilaganingizda uning yangi koʻrinishi Telegram rassomlari yaratgan oʻnlab maxsus variantlar asosida tasodifiy tarzda tanlanadi. Kolleksiyalanadigan hadyalar fon rangi, belgisi va raqamni oʻz ichiga olgan tasodifiy ikkinchi darajali xususiyatlar toʻplami bilan boyitiladi. Bu har bir kolleksiyalanadigan hadya noyob saʼnat asari ekanligini anglatadi va baʼzilari boshqalarga qaraganda yanada noyobroq boʻladi.

Qoʻlbola tort, Jele quyon, Ziravorli vino va Santa qalpogʻi kabi 20 dan ortiq mavjud hadyalar allaqachon kolleksiyalanadigan qilib yangilanishi mumkin, bu esa jami 1400 dan ortiq noyob koʻrinishlarni tashkil qiladi va kelajakda yanada koʻproq qoʻshiladi.

Boshqa foydalanuvchi uchun hadya sotib olayotganda siz uni allaqachon yangilangan holda yuborishingiz va bevosita chatda qabul qiluvchi yangi sanʼat asarini qanday ochayotganini koʻrishingiz mumkin. Hadyani yangilash oz miqdorda Telegram Yulduzlar talab qiladi, ular blokcheyn toʻlovlarini qoplash uchun ishlatiladi.

Agar siz muayyan koʻrinishlarni olishni yoki kolleksiyangizni tezda toʻldirishni xohlasangiz, kolleksiyalanadigan hadyalarni boshqa foydalanuvchilar bilan darhol almashtirishingiz mumkin.

Xizmat xabarlari uchun reaksiyalar

Kimdir sizga hadya yuborganida, guruhga qoʻshilganida yoki video chat boshlaganida suhbatda maxsus xizmat xabari paydo boʻladi. Endi bu xabarlar reaksiyalarni qoʻllab-quvvatlaydi — shunday ekan, ikki marta bosish orqali hadya uchun minnatdorchilik bildirishingiz yoki yangi aʼzolarni kutib olishingiz mumkin.

Xizmat xabarlari kimdir sizga chaqiruv qilganida, chatning profil rasmini oʻzgartirganida, yangi chat fonini tatbiq etganida, yutuqli oʻyin boshlaganida va boshqa holatlarda ham paydo boʻladi.

Xabarlarni qidirish filtrlari

Chatlar roʻyxatingizdagi qidiruv paneli sizga istalgan chatingizdan xabarlarni tezda topish imkonini beradi. Endi “Chatlar” sahifasidagi natijalar faqat shaxsiy chatlar, guruh chatlari yoki kanallardan natijalarni koʻrsatish uchun qoʻshimcha filtrlarga ega boʻlib, roʻyxatni aniqlashtirish imkonini beradi.

Qidiruv interfeysida oxirgi yuklamalar va ulashilgan mediani qarab chiqish uchun boshqa sahifalarni bosing yoki mashhur kanallar va mini ilovalar bilan tanishing.

Uchinchi tomonlardan tasdiqlash

Telegram jamoat arboblari va tashkilotlarga tasdiqlangan boʻlish imkonini beradi, shunda foydalanuvchilar axborotlarning rasmiy manbalarini tezda aniqlashi mumkin. Telegramda shaffoflikni yanada oshirish uchun rasmiy uchinchi tomon xizmatlari endi foydalanuvchi hisoblari va chatlarga qoʻshimcha tasdiq belgilarini berish imkoniyatiga ega.

Bu qoʻshimcha tasdiqlash uchun markazlashtirilmagan platforma ijtimoiy tarmoq platformalari uchun yangi xavfsizlik standartini belgilaydigan noyob proaktiv yechim bilan firibgarliklarning oldini olish va yolgʻon axborotlarni kamaytirishga yordam beradi.

Chat yoki hisob uchinchi tomondan tasdiq olganda uning nom yoki ismidan oldin kichik logotip paydo boʻladi. Uning profilini ochsangiz, uning holati va maʼnosi haqida batafsil izohni koʻrasiz.

Uchinchi tomon tasdiqlashi Telegram tomonidan jamoat arboblari va tashkilotlar uchun taqdim etilgan tasdiq belgilaridan butunlay alohida. Boshqalarga uchinchi tomon tasdiqlashini taqdim etish uchun xizmat avval Telegram tomonidan tasdiqlangan boʻlishi va ariza toʻldirishi kerak.

Uchinchi tomon tasdiqlashi haqida batafsil axborot ushbu qoʻllanmada mavjud.

Jild nomlarida maxsus emoji

Har kim oʻz suhbatlarini tartibga solishga yordam beradigan moslashtiriladigan chat jildlarini yaratishi mumkin. Jild nomlari endi maxsus emojilarni qoʻllab-quvvatlaydi, bu esa Premium foydalanuvchilarga jildlarini qoʻshimcha ifodali yoki matnni maxsus belgilar bilan almashtirish orqali minimalistroq qilish imkonini beradi.

12 milliondan ortiq Telegram foydalanuvchilari Telegram Premium obunachisi hisoblanadi. U tezroq yuklab olish tezliklari, tezkor chat tarjimasi, cheksiz maxsus emoji va boshqa shu kabi 30 ta ekskuziv funksiyani taklif etadi.

QR kod skaneri

Android va iOSʼda ilova ichidagi kamera endi birlamchi sozlamalarda QR kodlarni aniqlaydi va havolalarni tanlangan brauzeringizda ilovalarni almashtirmasdan ochadi.

Ilova ichidagi kamerani tezda ochish uchun asosiy ekranda oʻngga suring (Android uchun ilovada pastki oʻng burchakdagi kamera belgisiga bosing).

Telegram monetizatsiyasi muvaffaqiyati

2021-yilda Telegram birinchi marta barqaror monetizatsiya funksiyalarini joriy qila boshladi, bu esa mustaqil boʻlib qolish va kelgusi yillar davomida davomiy oʻsishni qo‘llab-quvvatlash imkonini berdi.

Bu yil Premium obunalar, maxfiylikni qadrlovchi reklamalar, Telegram Yulduzlar va boshqalar tufayli Telegram foyda olishga erishdi. Siz foydalanuvchilarimiz tufayli biz ushbu maqsadga erisha oldik — bu bizga foydalanuvchilarni ustuvor qoʻyish va maxfiylikni himoya qilishda davom etish imkonini beradi.

Buguncha shular. Bu 2024-yilning 17-yirik yangilanishi bo‘lishi kerak edi, lekin afsuski Apple’ning tekshiruv jamoasi eʼtiborsizligi sababli kechikdi. Sizni Yangi yil bilan tabriklaymiz va 2025-yilni yanada esda qolarli qilish uchun tez orada qaytamiz.

2025-yil 1-yanvar
Telegram jamoasi